Өзбекистан Республикасы «Исбилермен қыздың ең жақсы жойбары-2017» таңлаўында Қанлыкөлли жас исбилермен қыз банктен кредит алыў «Сертификат»ына ийе болды

Алдын хабар етилгениндей, Өзбекистан Республикасын раўажландырыўдың Ҳарекетлер стратегиясының «Халық пенен пикирлесиў ҳәм инсан мәплери жылы»нда қабыл етилген, Мәмлекетлик Дәстүриниң 210-бәнтиниң орынланыўы бойынша Қарақалпақстан Республикасында исбилерменлик тараўын баслаўды қәлеўши қызлар арасында «Исбилермен қыздың ең жақсы жойбары-2017» таңлаўлары өткерилген еди.

Таңлаўлар барысында, Қанлыкөл Педагогика колледжи питкериўшиси О.Д.Мырзабаева,  2017-жылдың 19-август күни Қарақалпақстан Республикасы басқышында «Ислеп шығарыў тараўында ең жақсы исбилермен қыз» номинациясы жеңимпаз болып, усы жыл 10-ноябрь күни Ташкент қаласында өткерилген «Исбилермен қыздың ең жақсы жойбары-2017» таңлаўында да жеңимпаз болыўға еристи.

Таңлаў даўамында, О.Д.Мырзабаева елимиздеги киши бизнес ҳәм шаңарақ исбилерменлигин раўажландырыў, кәсип-өнер колледжи питкериўши қызларын жумыс пенен тәмийинлеў ҳәм оларды экономикалық раўажландырыўға қамтып алыў барысында өткерилип атырған «Исбилермен қыздың ең жақсы жойбары-2017» таңлаўының Республика басқышында белсенди қатнасқаны ушын, Өзбекистан Республикасы Бас ўәзириниң орынбасары, Ҳаял-қызлар комитети баслығы Т.Нарбаеваның «Ташаккурнома»сы  менен сыйлықланды.

Сондай-ақ,  «Ислеп шығарыў тараўындағы ең жақсы исбилермен қыз» номинациясы жеңимпазы Мырзабаева Оразбийке Далимбай қызы «Нан ҳәм кондитер өнимлерин ислеп шығарыў» ушын «Агробанк» АТБ басқарма баслығы С.С. Ходжаев тәрепинен банк кредитинен пайдаланыў ҳуқықын бериўши «Сертификат»ын алыўға мияссар болды.

Таңлаў соңында шөлкемлестириўшилер тәрепинен О.Д.Мырзабаеваның жеңиси менен қутлықлап, өз бизнесин баслаўда табыслар тиледи ҳәм естелик ушын баҳалы саўғалары тапсырылды.

Пайдалы дереклер